Á Edduverðlaununum í ár voru veitt samtals 20 verðlaun til kvikmyndaverka sem frumsýnd voru á tímabilinu 1. janúar til 31. desember 2024. Uppgötvun ársins fékk Gunnur Martinsdóttir Schlüter en þau verðlaun fær einstaklingur sem ekki hefur hlotið tilnefningu áður í viðkomandi fagverðlaunaflokki en hefur vakið sérstaka athygli fyrir framúrskarandi framlag á árinu.

EGILL OG TINNA HEIÐURSVERÐLAUNAHAFAR 2025

Hjónin Egill Ólafsson og Tinna Gunnlaugsdóttir fengu heiðursverðlaun Íslensku kvikmynda- og sjónvarpsakademíunnar fyrir þeirra afar merka, fjölbreytta og mikilvæga framlag til íslenskrar kvikmyndalistar. Þau tilheyra hópi okkar allra fremstu og farsælustu listamanna.
Tinna og Egill hafa í bráðum hálfa öld verið afar stór og mikilvægur hluti íslenskra kvikmynda. Alls eru hlutverk þeirra í kvikmyndum og sjónvarpsverkum vel á sjötta tuginn.

Met í innsendum verkum

Alls bárust 72 verk og 129 innsendingar til fagverðlauna að þessu sinni. Met var slegið í innsendum verkum  en aukningin frá síðustu hátíð var rúm 80%.