Valnefndir Edduverðlauna

Edduverðlaunin eru fagverðlaun. Í því felst að fagfólk í greininni, meðlimir Íslensku kvikmynda- og sjónvarpsakademíunnar, veitir verðlaunin til þeirra sem skilað hafa framúrskarandi góðu verki á síðastliðnu ári.

Starf valnefnda er grundvöllur þess að verðlaunin standi undir nafni sem fagverðlaun. Til þess starfs er valið fólk sem hefur faglegar forsendur og metnað til að geta metið verkin af þekkingu og sanngirni.

Ferlið gengur svona fyrir sig: Framleiðendur ákveða hvaða efni þeir senda inn í Edduna ár hvert. Valnefndirnar fara yfir allt innsent efni og velja þau verk sem tilnefnd eru í hverjum flokki. Að lokum kjósa svo meðlimir Íslensku kvikmynda- og sjónvarpsakademíunnar á milli tilnefndra verka um það hver hlýtur Edduna í hverjum flokki fyrir sig. Í þeirri kosningu gilda atkvæði valnefnda 50% á móti atkvæðum ÍKSA meðlima.

Almennt um valnefndirnar:

Valnefndir, skipaðar af stjórn ÍKSA, skoða allt innsent efni og velja þau verk sem eru tilnefnd til Edduverðlaunanna. Valnefndirnar eru fjórar:

  1. VALNEFND UM LEIKIÐ EFNI. Skoðar eftirfarandi flokka:
    Barna- og unglingaefni ársins; Kvikmynd ársins; Leikari ársins í aðalhlutverki; Leikari ársins í aukahlutverki; Leikið sjónvarpsefni ársins; Leikkona ársins í aðalhlutverki; Leikkona ársins í aukahlutverki og Stuttmynd ársins.
  2. VALNEFND UM SJÓNVARPSEFNI. Skoðar eftirfarandi flokka:
    Frétta eða viðtalsþáttur ársins; Lífstílsþáttur ársins; Menningarþáttur ársins; Skemmtiþáttur ársins og Sjónvarpsmaður ársins.
  3. VALNEFND UM HEIMILDAMYNDIR. Skoðar einn flokk:
    Heimildamynd ársins.
  4. VALNEFND FAGVERÐLAUNA. Skoðar eftirfarandi flokka:
    Brellur ársins; Búningar ársins; Gervi ársins; Handrit ársins; Hljóð ársins; Klipping ársins; Kvikmyndataka ársins; Leikmynd ársins; Leikstjóri ársins og Tónlist ársins.

Minnst 7 manns skulu starfa í hverri valnefnd og skal stjórn ÍKSA gæta að hafa kynjahlutföll sem jöfnust. Að lágmarki skulu 5 valnefndarfullrúar í hverri valnefnd vera meðlimir í ÍKSA. Velja má 2 valnefndarfulltrúa til viðbótar sem hafa sérþekkingu, annað hvort menntun eða starfa á sviði kvikmynda og sjónvarps.

Skilyrði þess að starfa í valnefnd er að viðkomandi sé ekki með innsent verk í þeim flokki sem nefndin er að skoða, né má einstaklingurinn hafa persónuleg tengsl við þá sem eru tilnefndir. Sérhver valnefndarmaður skal staðfesta með sannarlegum hætti að viðkomandi uppfylli skilyrði til að starfa í valnefnd samkvæmt framansögðu og að hann muni starfa eftir vinnureglum ÍKSA.

Nöfn allra valnefndarmanna skulu birt á vef ÍKSA (www.eddan.is) eftir að Eddan er um garð gengin, án þess þó að tiltaka hver sat í hvaða valnefnd.

Vinnureglur valnefnda:

1. Verk skal velja út frá tveimur meginforsendum:

  • Sköpun. Hér er átt við það skapandi framlag sem í verkinu felst, efnistök og listræn gæði.
  • Fagmennsku. Hér er átt við fagleg vinnubrögð, tæknilega úrvinnslu og samband áferðar og efnis.

Markmið valnefndar er að leiða fram þau verk sem sköruðu fram úr í hverjum flokki. Í sumum tilfellum er verið að bera saman ólík verk. Þá ber að horfa á hvert verk fyrir sig, skoða forsendur þess (hvað er verið að reyna að gera) og meta hvernig hefur til tekist miðað við þær forsendur.

2. Starf nefndarinnar fer þannig fram að nefndarmenn fá í lykilorð að vefþjóni með aðgangi að því efni sem til greina kemur í viðkomandi flokki. Efnið er skoðað í gegnum aðgangsstýrt vefsvæði. Gera má ráð fyrir að nýjustu kvikmyndirnar geti nefndarmenn jafnvel skoðað í kvikmyndahúsi.

3. Þegar nefndarmenn hafa skoðað efnið, gefa þeir fimm bestu verkum eða einstaklingum í hverjum flokki einkunn og raða niðurstöðunni inn í þar til gert Excel skjal/kjörseðil. Fremsta (og besta) verkið fær 10, það næst fremsta 8, þriðja 6, fjórða 4 og fimmta 2.

Mikilvægt er að raða hvorki fleiri né færri en fimm verkum/nöfnum upp í röð en kjörstjórn getur ekki tekið við kjörseðlum valnefndarmanna nema að uppfylltu þessu skilyrði.

Kjörseðillinn er að því loknu sendur í tölvupósti til formanns kjörstjórnar, samkvæmt nánari leiðbeiningum. Fyllsta trúnaðar er gætt um atkvæði allra valnefndarmanna og atkvæði þeirra fara aldrei út fyrir veggi kjörstjórnar.

4. Valnefndum ber að skoða og dæma öll þau verk sem lögð eru fram í viðkomandi flokki. Stjórn ÍKSA hefur áður farið yfir allar innsendingar og tekið út þau verk sem ekki eiga heima í keppninni. Valnefndum er óheimilt að ákveða að einhver tiltekin verk eða tegundir verka komi ekki til álita.

5. Mikilvægt er að valnefndarmenn umgangist þau gögn sem þeir fá afhent af trúnaði. Um er að ræða kvikmyndaefni þar sem hætt er við að höfundarétti sé stolið. Því má alls ekki láta neinum öðrum í té það efni sem nefndarmenn fá aðgang að. Þess ber að geta að aðgangur að vefþjónum er skráður og kjörnefnd getur flett upp aðgangslistum.

6. Valnefndarmenn eru bundnir trúnaði um allt starf nefndarinnar bæði á meðan á vinnu hennar stendur sem og síðar. Ef upp koma álitamál eða spurningar skulu dómnefndarmenn hafa samband við stjórn ÍKSA sem sker úr um öll vafaatriði.

………

Valnefndarmenn Eddunnar 2017

Anna G. Magnúsdóttir
Arnar Benjamin Kristjánsson
Arnar Knútsson
Árni Jónsson
Ása Baldursdóttir
Ása Helga Hjörleifsdóttir
Ásta Briem
Birgir Þór Birgisson
Bjarki Guðjónsson
Bragi Þór Hiinriksson
Elísabet Rónaldsdóttir
Eva Vala Guðjónsdóttir
Guðbjörg Sigurðardóttir
Gunnar B. Guðmundsson
Hannes Þór Arason
Harpa Elísa Þórsdóttir
Heba Þórisdóttir
Helga Rakel Rafnsdóttir
Hrönn Sveinsdóttir
Júlía Embla Katrínardóttir
Marzibil Sæmundardóttir
Nanna Kristín Magnúsdóttir
Rannveig Guðmundsdóttir
Sævar Guðmundsson
Sigurgeir Orri Sigurgeirsson
Sindri Páll Kjartansson
Þórir S. Sigurjónsson
Þorvaldur D. Kristjánsson